Daar is ‘n tyd vir alles…

Met Paasfees agter ’n gelowige sien hy kans vir enigiets wat van vooraf aankom. Mag julle hierdie tweede kwartaal ingaan met dié wete: die stryd is gestry en die oorwinning is behaal!! Kom wat wil, dit kan nie die uitslag omdraai nie. Tetelestai!!

Ons Otjie-kos projek fokus hierdie kwartaal op die opvoeding van alle mense oor die waarde van kos en hoe jy slim met jou geld kan werk, al het jy baie min. Die idee is dat kinders en hulle ouers bemagtig word om vir bedelaars goeie raad te gee oor hoe hulle meer waarde vir hul bietjie geld kan kry. Dalk sal die beste wees om self R10 uit te haal en goeie kos daarmee te koop en vir die bedelaar te gee. Laai gerus die addisionele inligting af (“Nutrition vir bedelaars”) wat julle kan help met koskeuses. Hierdie inligting kan julle met bedelaars deel.

’n Laaste groet en ’n eerste hallo: Gielie groet:

Dit was my voorreg om die afgelope 12 jaar betrokke te wees eers by die Kinderkrans en later by KIX. In hierdie tyd het ek gesien hoe die Here gawes vir sy kerk gee, veral in die persoon van die wonderlike mense wat op die UK kon dien. Mense met die regte gawes en passie vir die regte tyd. Ek het ook beleef hoe die Here die kinderbediening op ’n baie spesiale en duidelike manier lei. Ek wil dit waag om te sê dat ek die Here se leiding in my 12 jaar by die Jeugkantoor die meeste en duidelikste in die kinderbediening beleef het! Dit het my altyd laat onthou: “Laat die kindertjies na my toe kom en moet hulle nie verhinder nie.”

My wens en gebed vir die kinderbediening is dat ons by die oorspronklike bedoeling van die Kinderkrans sal bly deur kinders bewus te maak van ’n wêreld buite hulleself. Ons het nog altyd ’n sendingfokus gehad en deesdae verkies ek om te sê die Here het ons gelei om missionaal te wees. Die verskil is dat sending kan verstaan word as iets ver van ons af en dat ons net met geld of uitreike by mense en plekke betrokke kan wees. Missionaal beteken dat ons elke dag met alles wat ons doen, naby en ver, God volg in wat Hy rondom en saam met ons doen. Elke leier moet daarom altyd dink hoe ons die kinders kan bewus maak van wat Jesus aan die doen is en hoe ons daarby kan aansluit.

Dit gaan beteken dat ons kinders moet leer wat diensbaarheid is en dat ons elke dag ons selfsug sal moet los. Mag elke ontmoeting of aktiwiteit of wonderstelling die kinders help verstaan dat ware geluk kom in die weggee van jouself.

Gelukkig is daar ook ’n eerste Hallo! Hallo aan ds. Anriëtte de Ridder wat by my oorneem. Anriëtte was ’n dominee in Stellenberg gemeente en het jare lange gespesialiseerde jeugbediening ervaring. Sy is baie opgewonde om ook haar besondere gawes en passie vir ’n breër platform aan te bied en glo my, sy het baie te bied!

Ek groet dus met hierdie briefie al die wonderlike leiers in Kinderbediening! Julle het regtig iets spesiaals in julle mondering. Wees getrou aan julle roeping, maak julle arms wyd oop vir die ongelowige kindertjies by die bewaarskole en gee net liefde, liefde en liefde. Soveel kinders het so ’n groot behoefte daaraan.

Anriëtte stel haarself bekend

Ek is die afgelope 13 jaar by Stellenberg Gemeente in die Noordelike voorstede van Kaapstad werksaam as jeugleraar. Ek is getroud met Koos en het drie kinders: Daniël (6 jaar), Ciné (3 jaar) en Jan-Carel (1 jaar). Jeugbediening, families en kinders lê my baie naby aan die hart. Ek sien baie uit daarna om as PSD vir Jeug- en Familiebediening te werk en is dankbaar vir die geleentheid. Ek glo dat die jeug en gesinne ‘n belangrike fokusarea vir die kerk is en sien daarna uit om behulpsaam te wees om effektiewe bediening en nadenke te fasiliteer.

Ek is ook baie opgewonde om deel te raak van die Kix familie – ek glo ons kinders het nodig om allerlei kreatiewe maniere van Jesus se omgee en sorg te leer. Daar is baie uitdagings in kinderbediening – ‘n veranderende wêreld, stressors, gebroke families en verskeie negatiewe invloede. Daarom raak ‘n effektiewe en holistiese kinderbediening al hoe meer van kritiese belang! Ek hoop dat baie van julle gaan saamwerk om kreatief en praktykgerig oor kinderbediening te dink en idees en getuienisse met mekaar te deel.

2016: ‘n Nuwe jaar!

Wat hou 2016 vir my in? Dis ’n vraag wat in die meeste van ons se onderbewussyn leef, maar wat ons nie kan beantwoord nie. Ons het almal die behoefte om voorbereid te wees. As iemand ons net ’n idee kan gee, kan ons onsself gereed kry en nie onkant gevang word nie. As gelowiges het ons egter die voordeel van God se beloftes. Ons ken ook nie die inhoud van die toekoms nie, maar ons ken die uitkoms! Iewers het ons al Jeremia 29:11 vasgebind in ons geheue: “Ek weet wat Ek vir julle beplan, sê die Here: voorspoed en nie teenspoed nie; Ek wil vir julle ‘n toekoms gee, ‘n verwagting!”

Ons vat die teks maklik vir ons, want niemand vra vir teenspoed nie. Tog is hierdie teks nie ’n waarborg vir die inhoud van die toekoms nie, maar wel vir die uitkoms. Die uitkoms is ’n herstelde realiteit, ’n versoende eenheid, ’n vredevolle beslag, ’n liefdevolle werklikheid! Ons het ’n versamelwoord daarvoor – hemel! Mag jy 2016 ingaan en nie hemel op aarde hê nie, maar hemel voor oë! Die oog vestig op die vreugde wat vir ons in die vooruitsig is. (Heb. 12:2)

Projek 2016: Otjiekos!

Vanjaar werk ons plaaslik. Maar hoekom so ’n vreemde naam… Otjiekos? Ons wil hê kinders en volwassenes moet vanjaar vir die “otjie” kos gee! Elke keer as jy ’n robotbedelaar of bedelaar op die straathoek sien en jy voel aangespreek of jammer vir die persoon, moet jy eerder die geld wat jy vir die persoon wil gee, in jou otjie gooi.

Die goue reël is – moet nooit geld vir robotbedelaars gee nie! Jy hou hulle daarmee op die straathoek. Solank jy gee, sal hulle daar bly staan. Jy help hulle ook net van die wal af in die sloot. Saam met die Kix.kom ontvang julle ’n inligtingstuk wat breedvoerig verduidelik hoekom daardie munt of noot wat jy deur jou venster aangee, bekend staan as “toxic charity”.

Ons het ’n alternatief. Voer jou otjie, gee hom kos en gebruik die geld om organisasies te ondersteun wat kan help met die probleem. Julle kan papier mâché-otjies bestel of self otjies maak. Op hierdie webtuiste is patrone waarmee julle otjies kan maak. Net die maak van die “otjies” kan groot pret wees. Julle kan selfs ’n kompetisie hou vir die snaaksste of mooiste otjie of ’n kompetisie om ’n naam vir die otjie te kies. Dis klein genoeg om by die rathefboom van ’n motor te pas en dit sal julle heeltyd herinner aan die projek om robotbedelaars van die straat af weg te help.

Met die projek gaan ons elke kwartaal iets nuuts leer. Hierdie kwartaal probeer ons mense inlig oor die gevaar van “toxic charity” en waarom jy nie geld moet gee nie. Volgende kwartaal verskaf ons inligting oor die beste manier om R10 te spandeer. Die wêreld van “Nutrition” is dan ons fokus. So gaan jy leer om armes te help om slim te koop, al het hulle min geld. Gedurende die derde kwartaal leer ons hoe om met bedelaars te praat en die oomblik se kontak menswaardig en positief te maak. Kwartaal 4 fokus ons op organisasies wat kan help en met wie julle kan hande vat daar in julle eie omgewing.

Ek hoop jy is opgewonde om saam met die kinders te fokus op die uitdagings in julle omgewing. Mag ons altyd onthou dat die toekoms en verwagting wat die Here skep nie net vir ons en ons kinders is nie, maar ook vir almal wat daar ver is. Dalk ver van hulp, ver van ’n opbouende lewe en ver van iemand wat regtig omgee.

As jy ook wil deel wees van ons Otjiekos Projek, begin sommer plaaslik in jou gemeente of dorp. Al die inligting wat jy nodig het, is op hierdie webtuiste beskikbaar. Jy kan na die einde van die jaar toe vir Sharon by die jeugkantoor kontak en reëlings tref om jul bydrae saam met die res van die land s’n te stuur.

Jeugkantoor kontakbesonderhede:
e-pos: jeug@sun.ac.za
telefoon: 021 808 9050

Uit die kantoor – September 2015

Is julle gereed vir die “nog vinniger hardloop”-kwartaal! Die laaste kwartaal het mos ’n manier om tussen al die jaareindgeleenthede so vol te raak dat jy 2 keer by jouself verby kan hardloop sonder om een keer te groet. Ek het so 2 jaar gelede ontdek dat die rede hoekom ons die Here as ver beleef eintlik net ons eie skuld is! Die Here belowe om altyd by ons te bly (Matt. 28:20), maar die probleem is, ons is so aan die hardloop dat ons nie altyd by onsself is nie! As ons die moeite doen om ons gees weer in ons liggaam te laat tuiskom, sal ons die Here naby ons beleef. Die beste manier om dit reg te kry, is deur te stop en stil te word. Mag jy die insig kry om die kwartaal gereeld stil te hou en vir jou gees te wag deurdat jy die seëninge van stilte vir jouself ontsluit.

Met die Kersgety wat om die draai is, het ons dit goed gedink om patrone te verskaf vir vingerpoppies waarmee die hele Kersverhaal vertel en uitgespeel kan word. Geniet die maak en gebruik daarvan. (Laai dit gratis af op hierdie webtuiste.)

Ontmoetings vir 2016

Ons gaan volgende jaar voort met ons driejaar reeks: “God se groot storie met die mens”. Ons begin by Rigters en werk deur tot by Nehemia. Ek dink die kinders gaan dit baie interessant vind om ook minder bekende karakters te leer ken en die geskiedenis van Israel en Juda beter te verstaan.

Projek 2016

Die een ding waarvan ons almal by KIX kan getuig, is dat die Here ons baie duidelik lei. Ons het soos gebruiklik weer die Getuieniskantoor gekontak oor moontlike projekte vir 2016. Intussen het iemand (soos my kinders sal sê: ’n “random” persoon) by ’n vergadering vertel van ’n projek waarby ’n gemeente betrokke is. Die Getuieniskantoor het na ’n paar weke teruggekom en gesê dat daar nie een duidelik projek is wat uitstaan en waaroor hulle vrede kry nie. Die projek van die spesifieke gemeente het egter ’n wonderlike energie op die vergadering laat ontstaan en die verbeelding op loop gesit.

Die belangrikste is dat ons na ’n baie lang tyd weer ’n plaaslike projek het. Ons het egter ook nie net een sentrale projek en begunstigde vir die projek nie, maar ons het ’n fokus wat in elke gemeenskap uitspeel. Die fokus is Robot-bedelaars (of dalk in jou omgewing: “stop-straat-bedelaars”).

Die projek se naam is die Otjie-kos Projek”.

Ons gaan “otjies” (spaarvarkies) kos gee en so ons robot- of te wel verkeerslig-bedelaars help. Ons projek het 4 afdelings:

  • Bewusmaking en opvoeding
  • Fondsinsameling
  • Vennootskappe en
  • Oombliklike noodverligting.

Die bewusmaking en opvoeding gaan ons doen deur ’n inligtingsblad op te stel waarin ons baie goeie raad kry oor die manier hoe ons oor robot-bedelaars moet dink en hoe ons op ’n verantwoordelike manier kan optree.

Die fondsinsameling gaan ons doen deur ’n “otjie” te maak met ’n gleuf in (ja, die regte spaarvarkie). Elke keer as ’n bedelaar by jou bedel, gooi jy ’n munt in jou varkie/otjie. Dis waar die naam “Otjie-kos Projek” vandaan kom. Ons sal in die eerste uitgawe van 2016 vir julle presies wys hoe om die “Otjies” te maak en te gebruik.

Met vennootskappe wil ons twee soorte organisasies identifiseer… ’n plaaslike en nasionale organisasie. (Die UK sal die nasionale organisasie identifiseer en elke gemeente/Kix vind ‘n eie plaaslike organisasie.) Die geldjies wat ingesamel word, word dan tussen die twee verdeel. Die nasionale organisasie se geld stuur julle na die jeugkantoor en die plaaslike een hanteer julle self.

Die oombliklike noodverligting gaan in die vorm van ’n “share a meal” konsep geskied. Ons is in onderhandeling met ’n maatskappy en sal in 2016 die aap uit die mou laat as alles gefinaliseer is.

Wees ook ambassadeurs vir die Kinderbond en Kix en vertel so ver as wat jy kom van die hulp wat daar is om die kinders in julle gemeenskap (veral by die bewaarskole) te bedien met die liefde van Jesus.

’n Mens wat kan wag, is ’n slim mens. ’n Mens wat kan wag as almal rondom jou jaag, is wys daarby!

Wees hierdie kwartaal ’n wyse mens en kyk na jouself!

Uit die Kantoor – Junie 2015

Ons weet nie hoe goed julle Sjona is nie, maar ons weet Piketberg se Kix is besig om teen snelle vaart hulle Sjona aan te leer. Die tweede kwartaal het pas begin toe ons ’n epos kry met die versoek vir nog Shona woorde. Piketberg het reeds so gewoeker dat hulle meer as net die 3 sinne kon “betaal”. Ons het ons Sjona-kenner gekontak en sy het nog ‘n paar sinne gestuur. Die nuwe sinne is:

Rava Bhaibheri namata zuva nezuvaLees jou Bybel en bid elke dag.

Mwari anondidaGod is lief vir my.

Mwari wakanakaGod is goed.

Jesu akatendekaJesus is getrou.

Ndinofamba naJesu – I walk with Jesus.

Kura pakutenda – Grow in faith.

Kura pakuziva Jesu – Grow in knowing Jesus.

Taura zvaJesu – Speak of Jesus!

Die Here voorsien altyd op die regte tyd. By ons vorige UK-vergadering het ons gewonder wat ons kan doen om ons projek weer ‘n bietjie momentum te gee. Voordat ons iets kon kry (of uitdink), daag ‘n oulike projekliedjie by ons op. Getrud van den Heever van NG Gemeente Boesmanland in Springbok het die liedjie geskryf en sommer die bladmusiek vir ons gestuur. Hulle was toe so gaaf om vir ons ‘n video op te neem waar hulle Kix-maats dit sing terwyl Getrud met die kitaar begelei. Hierdie video is verwerk en op ons webtuiste gelaai. Julle kan dit aflaai en almal behoort maklik te kan saamsing, praat en hande en vingers klap, want die woorde is ook op die video. (“Zim ABC wat die Woord gee.WMV”) Geniet dit en gebruik dit om weer ‘n bietjie momentum aan jul projekinsamelings te gee.

Ons het met Kix en die #Imagine-beweging net weer ontdek dat ons kinders en jeug positief is oor ons kerk en graag daar wil wees waar ons iets aanbied. Tog kan hulle uit hulle eie niks doen nie. Daar waar leiers entoesiasties is, gebeur die dinge. Ons kan regtig sien hoe sekere gemeentes net floreer en ons weet agter elke aan die brand bediening is daar volwassenes wat dit moontlik maak en hard werk! Hulle tyd is net so beperk en hulle moet ook maar diep gaan delf voor elke geleentheid, maar die vrug is duidelik.

’n Ou oom het eendag vir my gesê die beste ding wat jy vir jou kind kan gee is – blootstelling! Ek eer vandag elke Kix- en Kinderbondleier wat laer- en voorskoolse kinders blootstel aan die wonderlike ervaring van die Kinderbond en KIX. By die sinode van 2015 het ons weer gehoor hoe ECD (“early childhood development”) die antwoord op armoede in ons land is en ons het die geleentheid om deur KIX en die Kinderbond ECD-bediening te doen. Van die sprekers het selfs getuig hoe die Kinderkrans en Kinderbond hulle gevorm het.

Hou so vol en sterkte vir die derde kwartaal. Blootstelling is nie iets waarvoor iemand dadelik dankie sê nie. Tog na ’n tyd hoor jy hoe waardevol dit was.

Sterkte met jul kinderbedieninge!

Uit die Kantoor – Mei 2015

Hoe gaan dit met ons projek vir 2015? Ons sal binnekort nog oulike idees gee om weer ‘n bietjie woema te gee met ons insamelings.

Verlede jaar se projek

Tyd loop so vinnig aan. Wie kan nog onthou wat verlede jaar se projek was? Dit was die projek: “Vertel, vertel!”. Ons het geld ingesamel vir die “Vertel, vertel!”-Bybel wat in Zoeloe vertaal is. Hierdie Bybels gaan ons stuur na Msinga en Makhathini.

Teen einde-Maart het ons reeds die mooi bedrag van R 51 490.70 ingesamel. Ons weet daar is altyd nog gemeentes wat bydraes instuur. Julle is welkom om dit spoedig in te stuur sodat ons dit kan deurstuur. Met hierdie geld kan ons al amper 900 Bybels koop. Dit beteken 900 gesinne gaan blootgestel word aan die Bybel in hul eie taal. Dis eenvoudig geskryf sodat laerskool kinders dit vir hulle ouers kan lees. Dit gaan dus deur die skole versprei word en die kinders kan die “boek” gebruik om hulle lees te oefen en so kom die stories van ons wonderlike Here ook in die huise van Msinga en Makhathini.

Ek weet ons moet nie uitsonderings maak nie, maar ai, dis so wonderlik hoe die Here ook die harde werk van individue raaksien en dit seën dat dit tot seën van ander kan wees. Piketberg se KIX het vanjaar so gewoeker dat hulle R15 000 kon insamel. Boesmanland het ook nie lyf weggesteek nie en kon R5 000 bydra. Welgemoed het die mooi bedrag van R5 232 ingesamel en Hantam het R3 000 bygedra.

Sterkte met jul eie kinderbedienings!

Uit die Kantoor – Maart 2015

Kix en die Kinderbond is nou amptelik een. Ons is so dankbaar om te sê dat ons al die nodige toestemming het om uiteindelik ons bediening saam te doen. Ons is van mening dat beide handelsmerke goed gevestig is by die kinders en daarom kan jy maar praat van die Kinderbond, van KIX, van die Kix.Kom of die Sonstraaltjie. Ons lesse vanjaar is alreeds ’n vrug van hierdie eenwording.

Ons bediening kry vlerke

Ons is dankbaar om te sê dat twee van ons buursinodes amptelik weer by ons kinderbediening ingeskakel het. Ons het reeds verteenwoordigers van die Noord-Kaap wat ons help skryf en nou het ons die goeie nuus gehoor dat dié Sinode hulle amptelik afvaardig en opdrag gee om dié bediening ook in die Noord-Kaap te vestig. Net so het ons op die UK ook verteenwoordiging uit die Oos-Kaap. (Christine en haar man het daarheen verhuis.)

Verlede jaar se projek

Tyd loop so vinnig aan. Wie kan nog onthou wat verlede jaar se projek was? Dit was die projek: “Vertel, vertel!”. Ons het geld ingesamel vir die “Vertel, vertel!”-Bybel wat in Zoeloe vertaal is. Hierdie Bybels gaan ons stuur na Msinga en Makhathini.

Teen druktyd het ons reeds die mooi bedrag van R 51 490.70 ingesamel. Ons weet daar is altyd nog gemeentes wat bydraes instuur. Julle is welkom om dit spoedig in te stuur sodat ons dit kan deurstuur. Met hierdie geld kan ons al amper 900 Bybels koop. Dit beteken 900 gesinne gaan blootgestel word aan die Bybel in hul eie taal. Dis eenvoudig geskryf sodat laerskool kinders dit vir hulle ouers kan lees. Dit gaan dus deur die skole versprei word en die kinders kan die “boek” gebruik om hulle lees te oefen en so kom die stories van ons wonderlike Here ook in die huise van Msinga en Makhathini.

Ek weet ons moet nie uitsonderings maak nie, maar ai, dis so wonderlik hoe die Here ook die harde werk van individue raaksien en dit seën dat dit tot seën van ander kan wees. Piketberg se KIX het vanjaar so gewoeker dat hulle R15 000 kon insamel. Boesmanland het ook nie lyf weggesteek nie en kon R5 000 bydra. Welgemoed het die mooi bedrag van R5 232 ingesamel en Hantam het R3 000 bygedra.

Uit die Kantoor – Projek 2015

Die Here het ons gelei om vanjaar by die ring van Morgenster in Zimbabwe betrokke te raak. Die ring bestaan uit 8 gemeentes. Hulle het ’n groot behoefte aan kategese materiaal en ons gaan hulle bystaan om nuwe materiaal te ontwikkel. Die goeie nuus is dat die Sinode van Zimbabwe kennis dra van die projek en as alles afgehandel is, wil hulle die nuwe kategese materiaal ook vir die res van die gemeentes beskikbaar stel. Ons gaan dus in noue vennootskap met Morgenster Sending-stasie werk en saam ontwikkel aan nuwe boekies in Sjona (hulle amptelike taal). Dit het ons laat dink aan ’n projek naam. Omdat die Sjona alfabet gebruik gaan word om die Bybel stories aan kinders te bring, het ons die naam gekies: “Zim ABC wat die Woord gee”.

Nou het ons ‘n wonderlike idee om die Sjona alphabet te gebruik in ons fondsinsameling. Julle kan die Sjona alfabet aflaai vanaf ons webtuiste. Kopieer dit en knip uit. Daar is ‘n Sjona woord vir elke letter en dit sal baie pret wees om dit aan te leer. Die plan vir ons fondsinsameling is dat die kinders indiwidueel of in groepe die letters van een van die volgende 3 sinne kan koop teen R5 ‘n letter. Die drie Sjona sinne is:

Jesus loves you – Jesu anokuda,

God is always with you – Mwari anewe nguva dzose en

We pray for you – Tinomunyengetererai.

Die geld stuur ons vir hulle om nuwe kategese materiaal te skryf en te laat druk. ‘n Sin soos Tinomunyengetererai, wat 19 letters het, beteken R95. Sodra ‘n groepie al die geld vir ‘n sin ingesamel het, neem dan ‘n foto van die kinders saam met hulle sin en stuur dit na die Jeugkantoor. Ons sal sorg dat die gemeentes van Morgenster dit kry. Die 8 gemeentes se kinders gaan weet dat ons vir hulle omgee.

Vat dit huis toe

Ons het by ons Kix Sinode die tema “Vat dit huis toe” hanteer. Ons wil julle aanmoedig om die kinders te motiveer om dit wat hulle in die ontmoetings ontdek, ook met hulle ouers of voogde te deel. Verskeie van ons ontmoetings het “Vat dit huis toe”- voorstelle. Julle is self kreatief en ken julle eie omstandighede; dus kan julle ook jul eie “Vat dit huis toe”- idees gebruik.

Rituele is baie belangrik in ons almal se lewens (al besef ons dit dalk nie altyd nie). Die afgelope paar jaar skryf ons ontmoetings met vaste rituele as deel van die ontmoetings. Gebruik asb. die eerste ontmoeting se “welkom”-liedjie, temalied, stilword-ritueel en seënbede as verwysing vir die hele kwartaal se ontmoetings. Ons het die liedjie, “It’s a welcome here”, vertaal en met notasie by die eerste ontmoeting ingesit. Leer dit gerus vir jul kindertjies en sing dit elke week om almal welkom te laat voel.

Ons vertel “Die storie van God met die mens” van die skepping af. ‘n Voorstel om die kronologie duideliker te maak, is om ‘n lang koord of tou in jul lokaal te span en elke week se “storie” daar vas te steek (‘n prent, net die karakter se naam of die naam van die ontmoeting).

Deur die loop van die kwartaal word die prente van die diere by verskillende ontmoetings gebruik. Jy kan dit bv. in kleur kopieer en lamineer om bv. twee van elke soort te hê vir Noag se ontmoeting. (Daar is reeds 2 volstruise, want hul kleure verskil mos baie.)

Deur die loop van die jaar gaan ons een keer besempoppe, 3 keer viltborde en 6 keer sandbokse gebruik. Dit sal dus die moeite werd wees om uitgawes en moeite aan te gaan daarmee sodat dit weer-en-weer gebruik kan word. (Baie wenke en idees is op die Sinode-DVD en -handleiding.)

Daar is nog kans om ‘n DVD van die Kix-Sinode te bestel @R120 plus posgeld. Al die aanbiedings is daarop. Kontak Pauline Matthee so gou as moontlik by 084 593 0700 of 044-272 3356 of paulinematthee@webmail.co.za om seker te maak jy kry jou eie kopie. Dit kan bv. gebruik word om vir al die Kix-leiers of kategete te wys as toerusting. Jy kry ‘n kopie van die handleiding wat by die sinode gebruik is saam met die DVD.

1 2