Die Kinderkonferensie is om die draai!

 

“I can’t change the direction of the wind, but I can adjust my sails
to always reach my destination.” (Jimmy Dean)

Die wêreld verander so vinnig en soms voel ‘n mens oorweldig deur al die uitdagings wanneer jy kinders begelei. Die Kix-Konferensie Toegerus vir die Toekoms is ‘n ideale geleentheid vir jou en ander Kix-leiers, kategete, jeugleiers, ouers, jeugwerkers en predikante om oor die geleenthede van die toekoms na te dink. Kom luister na relevante sprekers, woon praktiese werkswinkels by, ontdek nuwe hulpbronne en netwerk met ander kinderbedieningsleiers. Nooi jou mede-Kix-leiers en ander belangstellendes om saam te ry en skryf dadelik in vir dié geleentheid op 11 en 12 September 2018. Die inskrywingsfooi van R300 per persoon sluit al die sessies deur die hoofsprekers, ‘n aantal werksessies (met benodigdhede), koffie, tee en middagetes vir albei dae in. (Kontak gerus die kantoor vir ‘n borg as jul hulp benodig.) Inskrywings kan gedoen word deur aanlyn by https://goo.gl/forms/sDipMigRwOnZzrsj1 te registreer.

Laai hier af: Program en inskrywingsvorm

Kom span jou seile sodat jy op die winde van verandering kan vaar! Ons sien daarna uit om jou daar te verwelkom.

Onderwerpe van die hoofsprekers:

  • Hoe kan ons ons kinders toerus vir die toekoms?
  • Die binnewerking van kinders met uitdagings
  • Kinders in vandag se skolekonteks
  • Die impak van tegnologie op kinders

Kursusgangers kan elke dag twee van die volgende werkswinkels bywoon:

  • Tekentegnieke
  • Leer buikspraak met handpoppe
  • Hoe begin ons ʼn Kix-groep?
  • Kreatiewe gebed met kinders
  • Fasilitering van ʼn groepie
  • Hantering van boelie-gedrag
  • Depressie onder kinders
  • Gewoontes in die huis
  • Kinders en musiek
  • Aanbiedingstegnieke
  • Bediening in skole
  • Gebruik tegnologie in kinderbediening

Jammer!

Die Jeugkantoor vra om verskoning vir versendingsprobleme wat met die tweede kwartaal se Kix.Koms gepaard gegaan het. Indien jy enige probleme ondervind het wat nog nie aangespreek is nie, kontak ons asseblief per e-pos by jeug@sun.ac.za of telefonies by 021 808 9050.

Ons deel opwindende nuus!

Teen hierdie tyd is almal al goed op dreef met Kix 2018 se ontmoetings: “Vreemde en Crazy stories in die Bybel”. Ons is dankbaar oor elke Kix-leier wat met die kinders werk in gemeentes, gemeenskappe, skole en nasorge. Ons hoor ook hoe Kix-groepe besig is om te woeker met die “Jesus vir Japan”-projek en ons hoor van kinders wat al in Japannees kan groet! Stuur gerus jul foto’s en video opnames vir ons om te deel.

Ons verwelkom Ronelle de Graaf as die nuwe sekretaresse in die Jeugkantoor. Skakel haar gerus vir enige navrae oor Kix-sake (e-pos: jeug@sun.ac.za; telefoon: 021 808 9050).

Opwindende nuus is dat die Kinderbedieningskonferensie om die draai is: 11 en 12 September 2018! Kix hou gewoonlik elke 4 jaar ‘n een-dag sinode waarheen alle Kix-leiers genooi word. Hierdie jaar hou ons ‘n groter twee-dag Kinderkonferensie waarheen ons ook alle ander kinderbedieningsleiers nooi. Dus word alle gemeenteleiers, predikante, kategete, ouers, oumas en oupas, onderwysers, jeugwerkers en almal wat met kinders werk, ook uitgenooi. Die konfe-rensie se tema is: “Toegerus Vir Die Toekoms”. Die dinamiese sprekers en praktiese werkswinkels sal oor ‘n verskeidenheid temas handel wat hierby aansluit. Kom leer hoe om tegnologie in te span, met ouers te werk en die nuwe geslag kinders (Generasie Y) beter te verstaan. Kom kry nuwe aanbiedingsidees en leer om kreatiewe vaardighede te gebruik. Kom koop hulpmiddels en kom gesels met ander mense en bedieninge wat met kinders in Suid-Afrika werk. Jy sal verseker toegerus wees vir die toekoms na hierdie heerlike twee dae! Die konferensie sal plaasvind in die noordelike voorstede van Kaapstad, maar die presiese plek en reëlings sal nog deurgegee word. Slaapplek en vervoer word deur deelnemers self gereël.

Ons sien daarna uit om jou en jou mede-Kix-leiers (en almal wat met kinders werk) daar te verwelkom!

Vrede en vreugde
Ds Anriëtte de Ridder

Uit ‘n ander hoek

’n Nuwe jaar… nuwe dinge… nuwe idees… nuwe moontlikhede… nuwe inspirasie en nuwe motivering. Ook vir ons betrokkenheid by Kix en Sonstraaltjies. Mag die inspirasie van die Heilige Gees jou vanjaar help om toegewyd te wees in jou bediening aan die jeug. Hulle is immers ons toekoms.

Die Kix-pirasie (’n Kix-nuutskepping van Kix en inspirasie) onderaan hierdie bladsy kan gebruik word aan die begin van elke kwartaal om leiers/leidsters toe te rus.

Nadat ons die afgelope drie jaar die Bybel chronologies deurgewerk het met “God se groot storie met die mens”, het ons vanjaar egter ‘n nuwe invalshoek. In die eerste kwartaal (hierdie uitgawe van Kix.Kom) kyk ons na Vreemde Vroue stories; in die tweede kwartaal gaan ons hoor van ‘n Paar Prettige Profete stories; in die derde kwartaal hoor ons ‘n klompie Snaakse Dierestories en  in die laaste kwartaal kyk ons na ‘n paar Crazy Kinderstories. Klink interessant, nè?

Vanjaar gaan ons ver, ja regtig baie ver, betrokke wees met ons projek. Missie Japan is ‘n organisasie van ons kerk wat al langer as 45 jaar betrokke is in Japan (www.missiejapan.co.za). Deur ons projek “Jesus vir Japan” wil ons saam met hulle veral uitreik na die jeug van Japan. In ons projekles is baie inligting, asook die fondsinsamelingsmetode. Verder is daar by elke ontmoeting eers ‘n stukkie “spioentyd” waar ons meer oor Japan uitvind op ‘n baie interessante manier.

Indien jy nuut is by Kix of Sonstraaltjies en enigiets wil weet, skakel gerus die Jeugkantoor (021 808 9050).

Ons nooi jou nou al uit na ons groot Kinderbedieningskonferensie “Toegerus vir die Toekoms” op 11 en 12 September 2018. Hierdie is die een geleentheid vanjaar wat jy nie mag misloop nie! Teken solank die datums in jou dagboek aan; ons sal in volgende kwartaal se Kix.Kom al die inligting hê.

Mag die Here jou in 2018 op ‘n besondere manier gebruik in die kinderbediening!


Jeugkantoor info:
e-pos: jeug@sun.ac.za
telefoon: 021 808 9050

Wie hou nie van geskenke nie?

Dis darem heerlik om ’n geskenk te kry! Die ekonomie plaas oral druk op ons en aan die einde van die jaar wil ons nog spaar vir Kersgeskenke ook! Het jy geweet ’n doelwit van KIX is om gratis materiaal vir Kinderbedieninge dwarsoor Suid-Afrika te verskaf? Dis darem heerlik om te weet dat daar nog kwaliteit hulpbronne vrylik beskikbaar is om jou te ondersteun in jou roeping om kinders te bedien. Dis ’n heerlike geskenk! En nog ’n groot droom is dat ons volgende jaar ons materiaal ook in Engels beskikbaar sal hê.

Ken jou feite: Weet jy … ?

  • Kix is ‘n nie-winsgewende bediening!
  • Die koste per gedrukte uitgawe dek bloot die druk- en versendingskoste.
  • Die projekgelde wat deur Kix-groepe ingesamel en na die kantoor gestuur word, word elke jaar 100% oorgedra aan die beoogde sendingprojek/organisasie. (Hierdie jaar is dit Kix Koester Kinders.)
  • Die skrywers word nie betaal nie. Hulle is gewone Kix-leiers wat hul gawes deel.
  • Kix word gebruik in skole, nasorgsentrums, kerke en uitreike regoor die hele land.
  • Voortaan het julle ook die keuse om teen R100 per jaar in te teken om die “dropbox link” met al die kwartaal se nuutste materiaal per epos te ontvang. Dit is geriefliker, aangesien julle dan nie die lesse een-een van die webwerf hoef af te laai nie. Voordat die gedrukte uitgawes gepos word, sal julle die “dropbox link” ontvang met al die materiaal in een lêer. Die donasie help ons en dis uiters gerieflik vir jou!
  • Tydens die Kix-Konferensie in September 2018 sal van die ou materiaal ook in boekvorm te koop wees.

“Maar hoe kan ‘n mens Hom aanroep as jy nie in Hom glo nie? En hoe kan jy in Hom glo as jy nie van Hom gehoor het nie? En hoe kan jy van Hom hoor sonder iemand wat preek? En hoe kan iemand preek as hy nie gestuur is nie? Daar staan ook geskrywe: ‘Hoe wonderlik klink die voetstappe van dié wat die goeie boodskap bring.’” – Romeine 10:14-15

Dankie vir elkeen wat onbaatsugtig diens doen om ons Kix-kinders die gratis geskenk van die evangelie te gee! Mag jy opnuut bewus raak van die geskenke wat die Gees ook vir jou in die proses gee!

Dis winter!

Ons is in die tweede helfte van die jaar! Dis winter, dis koud. Dit word gou donker en ons hoop dit sal baie reën. Dit beteken gewoonlik dat Kix-byeenkomste swakker bygewoon word. Die skryfbehoefte-mini projek is ‘n wonderlike manier om Kix-kinders te motiveer om te kom ÉN om ‘n verskil te maak. Sending is tog die hartklop van Kix! En dit is boonop in die winter dat mense in nood die swaarste kry…

Teen hierdie tyd weet jou groep al dat die Kix-projek van die jaar Kix Koester Kinders genoem word en dat ons geld insamel vir skryfbehoeftes vir die behoeftige crèches in Malawi. Julle kan egter ook bykomend ‘n plaaslike organisasie wat fokus op vroeë kinderontwikkeling, ondersteun. Op hierdie manier kry die Kix-kinders eerstehandse blootstelling aan die nood in julle eie omgewing.

Hoe vind ons ‘n plaaslike projek?

  • Dink aan al die plekke in jul dorp of omgewing wat met babas of kleuters werk (sien die “infographic” vir idees).
  • Kies ‘n paar plekke en lê besoek af om inligting in te win (een of twee leiers kan gaan).
  • Kies daarna een plek waar jul as Kix-groep ‘n praktiese verskil kan maak deur bv. iets in te samel (soos doeke, klere, speelgoed of blikkieskos) of iets te maak (soos kaartjies, prente, ‘n banier of koekies).
  • Beplan ‘n besoek om ‘n oorhandiging te maak en so die Kix-kinders aan die gemeenskap bekend te stel.
  • Neem foto’s en stuur dit na jeug@sun.co.za. Ons plaas dit graag in die Kix.Kom.
  • Hou vol om deurgaans die inligting oor Malawi te deel en daarvoor geld in te samel.

Mag Jesus jul harte warm hou hierdie wintertyd!

Uit die kantoor – April 2017

Ons is so opgewonde oor die eerste kwartaal! Die Nuwe Testament ontmoetings het tot heerlike byeenkomste gelei. Ons was ook baie opgewonde om te hoor hoe verskillende skole en kerke die Kix-materiaal gebruik. Enigiemand is welkom om ‘n Kix-groep by ‘n nasorg, gemeenskapsaal of kerk te begin. Die volledige inligting oor hoe om dit te doen en hoe die materiaal werk is ook aanlyn beskikbaar.

Hierdie jaar se projek, “Kix Koester Kinders”, fokus op die ondersteuning van voorskoolse kinders plaaslik asook die werk wat in Malawi in kleuterskole gedoen word. Ons is so opgewonde oor die terugvoer wat ons reeds ontvang van Kix-groepe wat geld insamel – die Kix-kinders is vol entoesiasme om die skryfbehoefte “mini’s” bymekaar te maak!

Kontak gerus die Jeugkantoor vir enige navrae.

jeug@sun.ac.za | 021 808 9050

2017 – ‘n Nuwe Jaar Vol Opwinding

Welkom aan almal wat deel is van die KIX-familie… by kerke, skole, Kinderbondtakke, kleuterskole, nasorg, kategese groepe en nog baie meer!

DIE KIX-DROOM

Die Kix-droom is dat daar in elke gemeenskap ‘n KIX-groep sal wees, hetsy by die kerk, skool, kleuterskool of nasorg, waarin elke kind Jesus kan ontmoet en saam die Bybel kan leer ken. Dankie dat jy deel is hiervan!

KIX 2017

ONTMOETINGS

Daar word elke kwartaal 6 – 8 lesse (ons noem dit eerder ontmoetings) op die webblad gelaai. Ses of sewe ontmoetings gaan oor die Bybel. Ons is hierdie jaar opgewonde om chronologies deur die Nuwe Testament te reis! Daar is elke kwartaal ook ‘n spesiale les oor of idees vir die kerkjaar (byvoorbeeld Paasfees, Kersfees, ens.). Daar is selfs iets vir spesiale geleenthede soos Moederdag en Lentedag.

KIX-PIRASIE

Elke KIX-groep het vrywillige leiers nodig. Dit is tieners of volwassenes met ‘n liefde vir Jesus en kinders wat kan help met groepwerk en om verhoudings te bou. Gebruik die begin van die jaar om genoeg leiers te werf deur die KIX-droom met hulle te deel. Die KIX-aanbieder het ook die verantwoordelikheid om die leiers te versorg. Gebruik die KIX-pirasie om jou leiers geestelik op te bou.

DIE KIX-PROJEK

KIX moedig kinders deurentyd aan om ook ‘n omgee vir die wêreld te ontwikkel. Daarom is daar ook elke jaar ‘n na-buite gerigte projek wat deur al die KIX-groepe saam ondersteun word. Die KIX-projek fokus hierdie jaar op die ondersteuning van vroeë kinderontwikkeling (VKO) en word genoem “KIX Koester Kinders”. Daar is twee bene – ‘n sending been en ‘n plaaslike been.

  1. Die sending been

Die idee is dat julle as groep deur die jaar geld insamel vir skryfbehoeftes vir die 5 behoeftige kleuterskole in Malawi met wie KIX ‘n verhouding het. Die kinders in jou KIX-groep raak op dié manier bewus van ‘n ander land, kultuur en taal en hulle leer hoe God wêreldwyd vir sy kinders sorg. Ons sal al die inligting oor hierdie deel van die projek verskaf.

Stap 1: Maak die kinders bewus van die projek en opgewonde om ‘n verskil te maak

Stap 2: Deel gereeld inligting (foto’s en stories) oor die Malawi créches.

Stap 3: Leer saam die woordjies in Chichewa.

Stap 4: Besluit hoeveel jul wil insamel en gebruik die skryfbehoefte handwerk items as motivering. (Sien bl. XXXX vir die besonderhede.) Maak dit ‘n groeppoging en hou die kinders weekliks op hoogte. Julle kan selfs jul gemeentes motiveer om ook by te dra.

  1. Die plaaslike been

Dit sal goed wees om egter ook in jou eie gemeenskap (of naby aan julle) ‘n plaaslike inisiatief te ondersteun. Wat kan julle doen?

Stap 1: Dink aan ‘n plek wat babas of klein kinders in jul gemeenskap versorg. (Kliniek, hospitaal, kinderhuis, sopkombuis, plek van veilige bewaring, pleegouers, kango-ouers, ens.)

Stap 2: Identifiseer ‘n behoefte waarmee jul kan help (dalk speelgoed of klere insamel, kaartjies maak, speel met kinders of gebed).

Stap 3: Deel inligting en foto’s met jou KIX-groep en bid vir hulle. (Onthou om ook terselfdertyd vir die kindertjies van die Malawi-been van ons projek te bid.)

Stap 4: Reël ‘n KIX-uitstappie om hulle te gaan besoek.

KIX OP DIE INTERNET

Jy kan KIX op pinterest volg: www.pinterest.com/k_kom/ en op facebook onder www.facebook.com/KixKinderbediening/ of www.facebook.com/groups/475678379142624/

Ons bid vir julle in dankbaarheid (volgens Paulus se gebed in Efesiërs 1: 15-23) dat julle hierdie jaar Jesus se geskenke van wysheid, hoop, rykdom en krag deur Sy Gees sal ontvang!

Amper alweer die einde van 2016!

Somer is amper hier en dit raak tyd om vrugte te eet en die sonskyn te geniet. In KIX is die laaste kwartaal soms ‘n uitdaging met vol programme en getalle wat kwyn. Maar dit is juis dié kwartaal waar ‘n mens die vrugte kan pluk van die jaar se harde werk en verhoudings bou.

‘n Paar wenke om die laaste kwartaal se vrug te geniet:

  • Fokus op dié kinders wat wel daar is – geniet die kinders!
  • Fokus op vaslegging.
  • Gee “gereelde” kinders verantwoordelikhede (klein takies).
  • Doen moeite om jou helpers gereeld te bedank.
  • Sien raak wat die Here die jaar gedoen het en loof Hom daarvoor!

OTJIEKOS PROJEK

Teen hierdie tyd is jul otjies seker al vol munte. Dalk wil julle vir oulaas ‘n insameling reël. Verdeel dan al die Otjiekos-projekgeld as volg:

Skenk 50% aan ‘n plaaslike organisasie in jou gemeenskap;

betaal 50% in as donasie by KIX as spesiale offer wat geskenk gaan word aan MES-aksie.

Hoe vind ek ‘n plaaslike organisasie?

Vind uit wie in jul dorp werk met straatmense of bedelaars. Dalk is daar ‘n nagskuiling, sopkombuis of werkskeppingsprojek. Kontak Badisa, die ACVV of jou plaaslike munisipaliteit om navraag te doen. Dink daaraan om nie net die geld te skenk nie, maar ‘n besoek of diensprojek te reël.

Wie is MES?

KIX ondersteun graag MES-aksie wat straatmense en behoeftiges help om onafhanklik te raak. Hulle het oorspronklik in Hillbrow, Johannesburg, begin, maar het nou al uitgebrei na Kempton Park, Port Elizabeth en Kaapstad. Lees meer oor hulle by www.mes.org.za.

2016 TERUGVOER

Dankie vir al die getroue KIX-leiers en -helpers wat dwarsoor Suid-Afrika in skole, nasorge, crèche’s en by kerke vir kinders meer oor Jesus leer. Om ‘n beter diens te kan lewer, vra ons julle hulp om ons in te lig oor die volgende:

  • Wie is jy?
  • Waarvoor gebruik jy Kix.Kom?
  • Is KIX deel van ‘n kerk se bediening? Watter kerk en gemeente?
  • Word KIX by die kerk, skool, crèche, nasorg of ander plek aangebied?
  • Wie is die groep waarmee jy werk?
  • Hoe groot is die groep?
  • Hoe oud is die kinders?
  • Hoeveel helpers (volwassenes) is daar?

Gee vir ons ook terugvoer oor die materiaal, ens.

Epos asseblief vir ons by jeug@sun.ac.za.

2017 SE PROGRAM

Ons sien daarna uit om in 2017 deur die hele Nuwe Testament te reis met lesse propvol nuwe idees en wenke. Ons hoop ook om ‘n hele paar nuwe KIX-groepe in ons familie te verwelkom.

Sterkte vir die laaste kwartaal van 2016. Mag die Feesgety ‘n tyd van liefde, vreugde en vrede wees in elkeen van julle se lewens!

Ons groet en verwelkom…

KiX se Uitvoerende Komitee het op Vrydag 20 Mei vergader. Ons het vir Gielie Loubser gegroet, tot onlangs PSD: Jeug- en Familie, wat die leisels nou aan Anriëtte de Ridder oorgee. Op die foto agter vlnr: Gielie Loubser, José Layman, Pauline Matthee, Francina Damonse, Sharon Naudé en Anriëtte de Ridder. Voor is Sulet van der Bergh en Susan Johnston. (Afwesig: Christine van Eyssen en Frieda Oncker.)

KiX se Uitvoerende Komitee het op Vrydag 20 Mei vergader. Ons het vir Gielie Loubser gegroet, tot onlangs PSD: Jeug- en Familie, wat die leisels nou aan Anriëtte de Ridder oorgee. Op die foto agter vlnr: Gielie Loubser, José Layman, Pauline Matthee, Francina Damonse, Sharon Naudé en Anriëtte de Ridder. Voor is Sulet van der Bergh en Susan Johnston. (Afwesig: Christine van Eyssen en Frieda Oncker.)

Sharon Naudé het die afgelope 5 jaar as sekretaresse in die jeugkantoor gewerk. Sy bly steeds deel van die Communitas-span, maar sy skuif eersdaags na ‘n ander afdeling. Namens die KIX-familie, wil ek Sharon bedank vir haar harde werk en toewyding. Sy het gesorg dat die Kix.Kom-uitgawes elke kwartaal betyds gepos word, sy het vergaderings gereël, navrae hanteer en nog baie meer. Dit is vir my duidelik dat KIX nie net vir Sharon ‘n deel van haar werk was nie, maar ‘n roeping. Ons gaan jou mis, Sharon, en ons bid die Here se seën toe op jou nuwe pad.

Ons verwelkom dan ook vir José Layman as die nuwe sekretaresse in die jeugkantoor. Die KIX-familie sien daarna uit om jou te leer ken en saam met jou te werk, José!

Ons verwelkom Anriëtte de Ridder:

Na amper twee maande in my nuwe pos het ek pas my eerste KIX Uitvoerende Komitee vergadering bygewoon. Dit is ‘n voorreg om eerstehands te hoor wat in KIX-kinderbedieninge aan die gebeur is dwarsoor die land. In kerke, skole, nasorge en saaltjies kom groepies kinders bymekaar om meer van Jesus te hoor. In hierdie uitgawe wil ek elkeen bedank wat ‘n leier of helper by ‘n KIX-groep is. Dis julle diensbaarheid en toewyding wat hierdie pragtige getuienisse van kinders wat speel-speel die Bybel leer ken, moontlik maak. Mag die Here elkeen van julle seën met Sy wysheid, krag en liefde!

#Imagine Kidz

Sosiale media gons met die verwikkelinge rondom #Imagine Kidz wat in die Oktober-skoolvakansie plaasvind. #Imagine Kidz is deel van die groter #Imagine-beweging, maar is gemik op 10-12 jariges. Die formaat is plaaslike vakansieprogramme wat in gasheer dorpe aangebied word. Ons wil graag elke KIX-groep uitdaag om     hiervan deel te word en self ‘n gasheer te wees vir ‘n #Imagine Kidz-program. Al die materiaal en opleiding word verskaf. Die fooi beloop R300 per dorp. Gaan na www.imaginekidz.com vir meer inligting.

Daar is ‘n tyd vir alles…

Met Paasfees agter ’n gelowige sien hy kans vir enigiets wat van vooraf aankom. Mag julle hierdie tweede kwartaal ingaan met dié wete: die stryd is gestry en die oorwinning is behaal!! Kom wat wil, dit kan nie die uitslag omdraai nie. Tetelestai!!

Ons Otjie-kos projek fokus hierdie kwartaal op die opvoeding van alle mense oor die waarde van kos en hoe jy slim met jou geld kan werk, al het jy baie min. Die idee is dat kinders en hulle ouers bemagtig word om vir bedelaars goeie raad te gee oor hoe hulle meer waarde vir hul bietjie geld kan kry. Dalk sal die beste wees om self R10 uit te haal en goeie kos daarmee te koop en vir die bedelaar te gee. Laai gerus die addisionele inligting af (“Nutrition vir bedelaars”) wat julle kan help met koskeuses. Hierdie inligting kan julle met bedelaars deel.

’n Laaste groet en ’n eerste hallo: Gielie groet:

Dit was my voorreg om die afgelope 12 jaar betrokke te wees eers by die Kinderkrans en later by KIX. In hierdie tyd het ek gesien hoe die Here gawes vir sy kerk gee, veral in die persoon van die wonderlike mense wat op die UK kon dien. Mense met die regte gawes en passie vir die regte tyd. Ek het ook beleef hoe die Here die kinderbediening op ’n baie spesiale en duidelike manier lei. Ek wil dit waag om te sê dat ek die Here se leiding in my 12 jaar by die Jeugkantoor die meeste en duidelikste in die kinderbediening beleef het! Dit het my altyd laat onthou: “Laat die kindertjies na my toe kom en moet hulle nie verhinder nie.”

My wens en gebed vir die kinderbediening is dat ons by die oorspronklike bedoeling van die Kinderkrans sal bly deur kinders bewus te maak van ’n wêreld buite hulleself. Ons het nog altyd ’n sendingfokus gehad en deesdae verkies ek om te sê die Here het ons gelei om missionaal te wees. Die verskil is dat sending kan verstaan word as iets ver van ons af en dat ons net met geld of uitreike by mense en plekke betrokke kan wees. Missionaal beteken dat ons elke dag met alles wat ons doen, naby en ver, God volg in wat Hy rondom en saam met ons doen. Elke leier moet daarom altyd dink hoe ons die kinders kan bewus maak van wat Jesus aan die doen is en hoe ons daarby kan aansluit.

Dit gaan beteken dat ons kinders moet leer wat diensbaarheid is en dat ons elke dag ons selfsug sal moet los. Mag elke ontmoeting of aktiwiteit of wonderstelling die kinders help verstaan dat ware geluk kom in die weggee van jouself.

Gelukkig is daar ook ’n eerste Hallo! Hallo aan ds. Anriëtte de Ridder wat by my oorneem. Anriëtte was ’n dominee in Stellenberg gemeente en het jare lange gespesialiseerde jeugbediening ervaring. Sy is baie opgewonde om ook haar besondere gawes en passie vir ’n breër platform aan te bied en glo my, sy het baie te bied!

Ek groet dus met hierdie briefie al die wonderlike leiers in Kinderbediening! Julle het regtig iets spesiaals in julle mondering. Wees getrou aan julle roeping, maak julle arms wyd oop vir die ongelowige kindertjies by die bewaarskole en gee net liefde, liefde en liefde. Soveel kinders het so ’n groot behoefte daaraan.

Anriëtte stel haarself bekend

Ek is die afgelope 13 jaar by Stellenberg Gemeente in die Noordelike voorstede van Kaapstad werksaam as jeugleraar. Ek is getroud met Koos en het drie kinders: Daniël (6 jaar), Ciné (3 jaar) en Jan-Carel (1 jaar). Jeugbediening, families en kinders lê my baie naby aan die hart. Ek sien baie uit daarna om as PSD vir Jeug- en Familiebediening te werk en is dankbaar vir die geleentheid. Ek glo dat die jeug en gesinne ‘n belangrike fokusarea vir die kerk is en sien daarna uit om behulpsaam te wees om effektiewe bediening en nadenke te fasiliteer.

Ek is ook baie opgewonde om deel te raak van die Kix familie – ek glo ons kinders het nodig om allerlei kreatiewe maniere van Jesus se omgee en sorg te leer. Daar is baie uitdagings in kinderbediening – ‘n veranderende wêreld, stressors, gebroke families en verskeie negatiewe invloede. Daarom raak ‘n effektiewe en holistiese kinderbediening al hoe meer van kritiese belang! Ek hoop dat baie van julle gaan saamwerk om kreatief en praktykgerig oor kinderbediening te dink en idees en getuienisse met mekaar te deel.

1 2